|
وينِك .. ؟
وينك ؟
من لي غيرك ؟
ولمين بعدك
تتركيني ؟
شريد
صدرك كان لي سكن ..
والحلم بيوم اللقا
كان أكثر من وطن .. !
وينك ؟
الأرق غزا عيني ..
كنت أغفى على صوتك
من بعدك ،
شلون بيغمض لي جفن ؟
ما عاد لهالدنيا طعم ..
وقلبي ، ما عاد يصبر
ع الألم ..
وروحي كل يوم أخدرها ،
وبْأمل باكر أعللها ..
وباكر بعيـــــــــــــــد
مثل النجم ، في السما يلمع
ونوره في ليلي يختفي ..
وأنا الحيران على أرضك ،
ما عدت أدري
لأي دربٍ أنتمي ..
وينك؟
بعد فرقاك ،
ما بقى في هالدنيا ظلم !
أنا بدونك ، مـ ..
.. أقول لك عيوني ،
كل كلامي اللي فوق انسيه ..
أنا ما أعرف أصفّ حروف شوقي لك وولهي بك وقلقي عليك بشكل معيّن أو ترتيب معيّن عشان
تصير أحلى ..
اللي فيني ما ينكتب ولا ينحكى .. ولا في كلمة توصفه ..
محتاج لك ، والله محتاج لك ..
ما عاد ليلي ليل ولا نهاري نهار ..
وكل اللي حولي يدرون فيني مع إنهم ما دروا باللي فيني ..
عيوني خبت ، إنتي كنتي نورها ..
كنت أشوف بك هالدنيا شحلاتها .. أشوف اللون ألف لون ، والحلو ألف مرة أحلى ..
الحين كلها مغطاة برمااااااااااد .. ريحته يأس وحطام ملت أنفي ..
رماد يلفني .. يضيّق عليّ .. يزرع كآبة وظلام جوة المليون جرح وجرح اللي سكنوا قلبي
من يوم فقدتك حبيبتي ..
روحي مقطعة أشلاء .. سكين ما ترحم أحسها جوة أحشائي .. وأحط يدي على صدري وأضغط ..
أضغط .. أضغط ، أبي لهالفراغ إنه يمتلي ..
بس شلون أقدر أعوّض وطن كامل كان يسكنّي ؟
وربي ما عاد فيني صبر ..
ولاشي .. أنا بدونك ولا شي !
تعبت .. تعبت من الوجع ليل نهار .. تعبت من الحقيقة اللي تملا عيوني يوم بعد يوم ..
حقيقة إنك غبتي ، وإن الأمل اللي متمسك فيه بآخر الصبر اللي فيني ، هو حبل أوله في
القاع اللي أنا خايف منه .. !
آه يا عيوني إنتي ..
ويا كل اللي لي .. ويا فدوتي ..
هالسؤال يذبحني في كل لحظة ألف مرة ،
يا ترى حبيبتي ، إنتي بخير .. ؟
|